ملفات >

هل تقبلين أن تصبحي الزوجة الرابعة ؟ استطلاع للرأي قامت به "الواقع " 80 % " يغور .. 15 % متوقف علي حالته .. 5 % بس يجي



قامت بالاستطلاع : مريم رفعت



 

الناس من خنقتها في الشقق الضيقة ، والشباب من احتياجه الشديد لوظيفة تشجعه علي الزواج ، والبنات من قسوة الحياة وطول فترات انتظار فارس الأحلام ابو حمار ابيض .. بدءوا في الرغي والبحث عن حلول لمشكلة الزواج ، وجاءهم مسلسل الحاج متولي ليمثل لهم القشة التي يمكن أن تنجدهم .. فعلا الرجل يجب أن يتزوج من اربع نساء .. ونبعض الناشطات ايدن ذلك .. ولكن لأننا جريدة بتاعة القراء فلن ننقل تصريحات رسمية ولا صرخات من وراء مكاتب .. وكانت نقطة انطلاقنا هل تقبل فتاه أن تتزوج من رجل متزوج من ثلاثة نساء؟

 

80 % من البنات قالوها بالفم المليان " يغور " أفضل أن أظل عانس من نار الغيرة .. 15 % قالوا دا متوقف علي الحالة هل مطلقهن ام ماذا ، 5 % قالوا بس يجي ويقدر يصرف علينا .. العينة كانت 50 فتاه .. جزء منهن علي الفيس بوك .. وجزء في الشوارع .. وجزء أصدقاء وأصدقاء الأصدقاء ..ننقل لكم بعض هذه الآراء

آراء بنات

بتاتا .. ابدأ .. ارفض كانت كلمات " مريم رفعت " والتي قالت : "لا اعلم فانا أرفض هذا ربما لو كان فقط خطبة يمكن ، ولكن الزواج صعب لأنه حتى وأن كان هو ضحية ، فيعني هذا عدم رجاحة عقلة في الاختيار الزواج قرار صعب جدا ويستلزمة مصاريف وتكاليف ليست ببسيطة ، فكيف يمكن له أن يتخذ القرار ثلاث مرات خطأ  وهو الرجل ، هذا شئ مقلق خاصة في هذا الزمن لانه قرار يستلزم منا الكثير لاتخاذة .

لو كان مطلق ممكن قالتها نجلاء محمد حيث تري :"لا يضر إذا كان فشل في زيجاته الأخرى"

مرة وحدة ممكن قالتها "نريمين سعد الدين" وأكملت :"ممكن أتجوز واحد متجوز مرة واحده أو هو يتجوز عليها مش مشكلة ، حقه برضه وممكن تبقي ظروف فرضت عليه ذلك ، بس متهيألي أكتر من كده يبقي حد عينه زايغة ومش مضمون "

ارفض نهائي هذه الجملة ملخص كلام "نور سليمان" وقالت : "ولا متجوز قبلي واحده بس ، لأنى مش هأرضى اني اخرب بيت حد ، ولا هأقبل ان حد يشاركني في شريك حياتي ، ولا عمري هأرضى أبداا ، ده أصلا يبقى راجل مزواج و بينزل من نظري على طوول"..

ممكن واحدة أو اثنين حددتها " سوسن الجمل " وقالت :" ممكن اتحمل ان أكون زوجة ثانية بس لو فيه حب جمعنا فيستاهل تضحيتي وممكن اثنين بس يبقي مطلق وحدة منهما ولكن ازيد من كدا بتهيالي انها تبقي فطاسة "

 

أمهات

انتي تقبلها قالتها " سهير عزت " : أنت لو تقبلي يبقي انا اقبل علي بنتي ، الزاي ارميها في نار الضرة ، دي تفضل بجنبي عانس واصرف عليها أحسن "

لو ليه ظروف ممكن كان مضمون الحاجة" رقية " وقالت :" في ظروف كثيرة خصوصا في الأيام السودة دي البنات مش بتتحمل فتطلب الطلاق ويكون الشاب مظلوم وانا عندي ابني هداية الرحمن ومطلق بس ان بنتي تتزوج من واحد عنده 3 ستات فهذا قله عقل "

شباب رجال

لا طبعا كانت بداية كلمات "محمود نصيف" وقال :"صراحة انا بقول لأ طبعا
لو كان مطلقهم يبقى فيه عنده عيب ، ولو موجودين على ذمته وعاوز يتجوز الرابعه يبقى هو شهوانى زيادة عن اللزوم ولعبي ،انا شايف انه بلاش.. لأن ممكن يكون الراجل ده غير سوى او ممكن اكون أنا غلطان والله اعلم "

مش حرام بدأ "عبدو سلامة " كلامه وقال :"ممكن لأنه أولا مش حرام ثانيا مش راجل وممكن العيب مش منه من الثلاثة اهم حاجه يكون عنده دين"

لا يمكن نحدد قالها "مصطفى ريان" :"ماتقدريش تحددي كل واحد له ظروفه وله طريقه تفكيره  ، ممكن واحدة تقولك ربع راجل احسن من لاشئ ممكن واحدة تكون بتحبه ومش فارق معاها موضوع جوازهدة خالص بصي انا مقتنع ان ربنا لم يشرع لنا إلا ما نستطيع ان نفعله ونتحمله فإذا شرع لنا التعدد فهو يعلم مسبقا ان هناك من عباده من يستطيعه من الرجال ويقبله من النساء"

في النهاية نقلنا لكم أهم التعليقات من ارض الواقع من البنات أصحاب الشأن والامهات والشباب ، وخرجنا بنتيجة واحدة هو ضرورة البحث عن حلول حقيقية ، في مساعدة الشباب للعمل وللزواج بدلا من الافكار الخايبة .






شاهد ايضا

6 Comments


  1. 11/09/2010

    أنا عن نفسي موافق و مش شايف فيه حاجة ، اللي عايز أربعة في الحلال أحسن ما يبص بس و يدور في ذهنه الحرام .
    بس أهم حاجة التلاتة الأول شكلهم و أخلاقهم عاملة ازاي ، و أن ميكونش فيه تفرقة و طبعاً لو التلاتة مش شارطين يبقوا تلاتة و مايزيدوش .
    بمعني أن اللي عايز يقول للأولي انه هيتجوز بعدها ،و يبقي فيه صراحة و عدل .
    و بعدين اللي يتجوز 4 محتاج يبقي هتلر مضروب في الخلاط مع بيل جيتس عشان المكائد و المصاريف و الأولاد .الخ

  2. 10/09/2010

    هنقول انهالموضوع شائك لانه متشعب جداما بين اتزامات الرجل نحو بيته والظروف الاقتصادية الى عايشين فيها رغم انى مش مقتنع بيها اصلا لاننااحسن حال من عيرنا مصر مليانه بالخير والوطن العربي مليان خير لكن كلنا يعلم ما بين السطور وبالاخير لنا الله جميعا شبابا ونساءا والله على كل شئ قدير

  3. 15/08/2010

    http //www.islamway.com/?iw_s Article iw_a view article_id 218
    أسباب تعدد الزوجات في الإسلام على هذا الرابط
    مشاء الله ياريت كل وحدة تفهم معنى التعدد وانا موافق لأن كل هذا في الحلال وستر البنات والنساء

  4. 15/08/2010

    والله تحقيقك كتير حلو ولو سالتيني انا ازوج بنتي واحد متزوج هقول لك يغور بداهية تعنس احسن الا اذا ربي كاتب ليه غصبن عني موضوع رائع
    مريومة

  5. 15/08/2010

    الامر يتوقف ع الحالة نفسها هل هى حب أو زواج فاذا كان الزواج عن حب فلأ و 1000 لأ , لأننا عندما نحب نريد من يهواه القلب لنا وحدنا أما اذا كان زواج صالون , ولأن الرجل عبىء ثقيل جدا , فلا مانع , وهذا بالطبع يتوقف ع ما يستطيع الزوج تقديمه للزوجة حتى تقبل به بعلا و ترضى أن يقاسمها فيه غيرها

  6. 15/08/2010

    الرجالة قليلة و الستات العدد فى الليمون لازم نقبل

اضافة تعليق