القصة الومضة >

يوميات أم مفروسه / الحلقة الخامسة عشر..... مسلسلات . / بقلم رنا هاشم






رمضان كريم خلاص فاضل عليه يادوب

ممم

مَلك يا مَلك

ممم نعم

بقولك رمضان كريم ... مالك ؟؟

ولا حاجة

مالك مندهشة كده في أيه الجرنال

بيقولو يا نادين إن تكلفة مسلسلات السنة دي 300 مليون جنية و دي إحصائية
أولية ممكن توصل لمليار جنيه
في مسلسل لوحده متكلف 93 مليون جنيه رغم أنه مش تاريخي
معروف عن المسلسلات التاريخية تكاليفها أكبر من المعتاد .. لكن 93 مليون معقول

صحيح أن الفن رسالة كبيرة و مهمة و راقية لما تتوظف صح بأهداف واضحة و
توجهي رسالتك لشرائح المجتمع المختلفة
و خاصة أن فيهم ناس بسيطة عندها المسلسل ده شيء مهم جداً بيسلي وقتهم
وبيطلعهم من مود الشقا اللي هما فيه طول اليوم عالم بتكح تراب من اللي
بيشوفوه ليل ونهار ناس غلابة طفحانين الدم علشان لقمة العيش لما يجي
غلبان من دول و يشوف مشهد لممثل بيحبه و يقدره وتفهمه أن مشهد معين من
المسلسل الكبير ده تكلف 2,5 مليون جنيه لمشهد مدته على الشاشة 5 ثواني
وهو راجع في جيبه حاجة متسدش الرمق
مش دا يبئا أسمه إستفزاز

لما تيجي ممثلة زى الفل شمعه منوره زى ماصاحبنا أبو دم خفيف بيقول
بنشوفها من سنه 72 فى الافلام وتيجى تعملك ولا شابه 35 سنه والمشكله ان
الشد والبوتوكس معادش بيجيب نتيجه من كتره والسن له حكمه بردوا
والمفروض أنى أقتنع بحضرة الممثله الكبيرة وهى عامله فيها نُغه

ولما تعترضي تبئي منفسنه ومش طايقه النجاح

طيب قوليلى أنت وخاطبي الشريحه المثقفه اللي هى بئا قاعدة للرقى والجمال
والابداع أزاى تتابعى 70 مسلسل غير الفكه ,
مش ده يبقى إسمه إستفزاز مبارة إبتداء
من 10 الصبح حتى مطلع الفجر ومن بعدها الاعادات
صراحه يانادين معنديش غير جمله واحده أرد بيها على التلوث الفكرى اللى
حاصل أنه شئ فى منتهى الغثيان ويحدث بأيدى كبار الإعلامين والمثقفين فى
البلد

السؤال هنا هى الفلوس دى متحلش مشاكل منكوبي الزلازل وضحايا صخرة الدويقه و غيرهم

والسؤال الأسخف إن المسلسل مش معمول للطبقات المخمليه فقط فى ناس بتكح
تراب علشان تتفرج على مساحه ولو ضئيله من المتعه لما تقوله رقم التكلفه
المخصصه بس لطاقم عمل أجنبي لمشهد ما مليون ونص أو أكثر
متزعلش من ثوره الجياع اللي أنتو بتترعبوا من سيرتها
ياااااااااااااااااى ناس بيئه

أصل البزنس لما بيدخل فى المواضيع دى بتعمى القلوب واللي بيحصل ده أسمه
إهدار للمال العام والدوله معنية مش بقتل الإبداع والحجر على الأفكار

مش من حق حد يحجر ويحلل ويحرم لكن من حق الدوله أنها توقف نزيف المال ده
وتوظفوا صح البلد دى فيها غلابه كتير

وبنظرة سريعه للوراء وقبل قرف الدش والنت إفتكرى مصر كانت إزاي بتستنى
مسلسل الساعه 7:15
إفتكرى إبو العلا البشرى وعصفورالنار والشهد والدموع والليالى باجزائها
,كان الهدف الابداع و تقديم فن و لخدمة الفن كقيمة سامية هادفة و ممتعة
في نفس الوقت مسلسلات دلوقت عباره عن تلوث فكرى أساسه المكسب ده غير
صراحة المشاهد المرعبة والإيماءات الصارخة و الرقص والعري

و طبعاً اللي بقوله ده قمة التخلف عند بعض من المثقفين والبرجوازيين بس
ببساطة احنا في شهر رمضان ودي بالفعل مناظر مستفزة مش كده

في ولاد صغيرين في عًرف في أصول هو أحنا عايشين
في نيوجرسي دي مصر يا جماعة الخير

و رغم كده محدش ضد الأبداع أحنا ضد الإسفاف و في فرق كبير بين الأتنين

والحل بسيط جداً نظفى التلفزيون

معقول ؟؟

طبعاً يا نادين معقول

الإستمتاع الطفولي اللى كُنا بنحسه فى قيمة الإشياء زى فوازير نيلي
وشريهان و بوجى وطمطم
خلاص فنيتو ياخبيبي
دلوقتى بزنس إز بزنس
واللى مش عاجبه يشرب من البحر

وبصراحه أكبر قررت أشرب من البحر وأرحم صحتى ونفسيتى من حاله الهذيان دي
السباق الهستيري المفعم بالجنان
دى ناس عندها مشاكل نفسية وربنا

والله يانادين ساعات بتاكد فعلا إن كل حاجه من حواليا سراب ماشيه لوحدى
بجرى لوحدى بتكلم لوحدى وكأني عايشه لوحدى
بحس أن الناس كأنها في دنيا تانية مفيش حاجة بتفرق معاها خلاص

عن نفسي خلى المسلسلات تنفعهم بلاش قرف

مش حاجه تفرس ؟؟

~ ~ ~ ~ ~ ~ ~
فكرة و مراجعة
الكاتب / محمد حربي الكومي

سيناريو / رنا هاشم








شاهد ايضا

0 Comments


اضافة تعليق