مدونات >

مدونه اتفلسف






كتبت : سحر عمرو

صاحب المدونه المهندس قاسم محمد

 مهندس مصري يعمل مدير فرع الصعيد , شركة صقر باور جنريشن ايجيبت

صاحب المدونه  يكتب في التعريف عن نفسه بانه رجل اعتاد التعبير عن رأيه بصراحه و وضوح

لينك المدونه

http://etfalsef.blogspot.com/2012/01/blog-post_7297.html

تتضمن المدونه العديد من التدوينات المتنوعه و المختلفه منها ما هو سياسي يعبر عن رؤيه الكاتب السياسيه في الاحداث الجاريه و منها ما هو رومانسي و يتحدث عن المرأه .. كما تحتوي على بعض الاشعار لصاحب المدونه

و من التدوينات الموجوده بالمدونه

أشباه النساء !!..

البرلمان بين شرطة مبارك وجيش طنطاوى !!

أبحث عنك...

عشق حصرى ..

إشراقة الصبح الجديد

عايز عروسه على المقاس

اراء حول الاخوان المسلمين كنظام سياسي

و من التدوينات الموجوده بالمدونه تدوبنه " كروته الثوره " و يتحدث فيها المدون عن الثوره المصريه و انخداع الثوار و الخطأ الاكبر الذي فعلوه عندما تركوا الميدان فور تنحي مبارك غير مهتمين بالتفاصيل التي نعيش توابعها الان

و اليكم التدوينه

كروتة الثورة !!..

علشان أنا راجل خيالى وااسع أوووى وبحب أبص أبعد من نظرة الناس وأعمق مما تبدو الأمور فلقيت نفسى بعد التنحى بفكر فى "كروتة الثورة " .. كنت مستغرب أوى ليه ثورتنا خلصت فى 18 يوم ومبارك اللى كنا شايفينه أرسخ فاسد عربى إتخلع بسهولة والأمن المركزى اللى كان بعبع للجميع هرب بسرعة كدا وأمن الدولة بجبروته بقى زى الفار المبلول !!..فى الاول خفت أشارك الناس خيالى أحسن يقولوا عليا وش نكد وعديم التفاؤل ووو خصوصا بعد مقالات بلال فضل وغيره عن الجيش العظيم والمجلس العسكرى الوطنى .. كنت بحاول أمسح فكرة ان مافيش وردة بتطلع فى مقلب زبالة وان مستحيل البلد يبقا الفساد فيها للعنين ويبقى عندنا مجلس عسكرى ضد مبارك أو قضاء غير مسيس !!..

ومع ذلك أعترف انى استسلمت ومشيت مع القطيع وحاولت أكتم أفكارى ولو انى مش مقتنع بس اهو نجرب ونستنى ويمكن دا شواذ القاعدة !!..

لكن بعد مرور سنة من الثورة لقيت انى كنت بخدع نفسى .. وإن فعلا الثورة اتكروتت بحرافية عالية جدا .. وان المجلس العسكرى جزء من النظام لا يتجزأ ..وإن العملية كانت مجرد سفينة بتغرق وكان لازم نرمى الحمولة الزايدة علشان ننقذها .. وان اتنين حرامية سرقوا ولما الناس جريت وراهم واحد عمل انه مع الناس وفضل يضرب فى التانى علشان الناس ما يقتلهوش ويبقى بيدى لا بيد عمرو !!

الثورة اتكروتت فى 18 يوم قبل ما يبقى ليها قائد .. قبل ما الناس تشكل البديل .. قبل ما يكون فى ممثل ليها زى ليبيا مثلا .. خدوا الثورة فى حموتها والناس غرقانة فى شهوة النصر بخلع مبارك .. هوب هوب ..يلا ياعم مشيلهم مبارك ومش هيصدقوا نفسهم وهيتهبلوا من الفرحة .. ويطبلولك .. وهوب هوب .. نفرقهم .. نشتتهم فى مين صاحب الفضل ؟!!.. فى مين اللى كان ليه أكبر تأثير ؟؟!!.. فى مين الزعيم ؟؟!!.. هوب هوب .. نخططلهم برواقة بعد ما نشيل ضغطهم عن دماغ ابونا !!

الثورة اتكروتت لما استسلمنا لإستفتاء عبيط محدش فاهمه لحد دلوقت .. هل هوا بديل عن دستور 71 ولا مجرد ترقيع .. موعوا الموضوع .. لو قلنا رئيس مجلس الشعب المنتخب يحكم يبقى دستور 71 سقط ولو قلنا ماينفعش انتخابات رئيس قبل الدستور أحسن تبقى جمهورية برلمانية يقولك لأ طبقا لدستور 71 الدولة رئاسية !!.. وغيره وغيره ..

الثورة اتكروتت .. لما خالف المجلس المباركى المواد اللى استفتينا عليها .. لما سمح بإنشاء أحزاب دينية .. وساب الدعاية فى المساجد والكنائس وأهو الناس تتلهى مع بعضها وأفضالهم أنا أخطط براحتى !!..

والثورة اتكروتت لما بقى القضاء مسيس وبمليونية ولا اتنين مبارك يدخل القفص وزكريا عزمى اللى اتساب شهور يظبط فى ورق الرئاسة يعتقل ولما فيديوهات موقعة الجمل تبقى مع هالة سرحان والمحكمة بتعرض فيلم الباشا تلميذ !!..

الثورة اتكروتت .. لما نجحت خططتهم وكل تيار صدق انه قوى وانه لازم يلحق يجرى ياخد نصيبه من التورتة ومش مهم لو وقف فى زوره او مات من التخمة .. ومش مهم ان مصلحتنا واحدة وكان احسن نسقط باقى النظام وبعد كدا اللى عند اخويا مايضعش !!..

الثورة اتكروتت لما بقت مطالبها بتتنفذ بالحتة ..وكل حتة تاخدلها شهر ..واهو العداد بيعد والست شهور يبقوا سنة ونص ويمكن باقى العمر .. والثورة تبقى زى قضية فلسطين .. ونلاقى نفسنا سنة 2067 بنطالب بحق الشهيد ومحاكمة مبارك ونظامه بتهمة الفساد السياسى !!..

الثورة اتكروتت لما جابوا عصام شرف من الميدان وقروا فيه انه ضعيف وانه سهل السيطرة عليه وانه مش هيقدر قوة الشعب اللى فى ضهره ويبقى محدش ليه حجة لانه جه منهم وكان الميدان معصوم من الخطأ أو كأن الخطا مرة خطأ أبدى لا يستوجب الغفران !!..

الثورة اتكروتت .. لما جابو الجنزورى .. علشان مربوط فى أزهان حزب الكنبة وخصوصا من موظفين الحكومة انه راجل عدالة ونزاهة وووو من مخدرات الأعصاب السياسية .. وبكده يضمنوا ولاء حزب الكنبة ..ويبقى لو حد فتح حسه الشعب هيرد على الشعب ونبقى بعيد ونقوم بدور التحجيز بينهم .. ومحدش فكر فى ان نفس الجنزورى قعد 11 سنة فى بيتهم ساكت على مبارك ومبارك على سكوته !!..

الثورة اتكروتت .. لما سابوا خالد عبدالله وتوفيق عكاشة وساويرس ووووو .. يتبادلوا التهم والبلبلة ومحدش عارف مين الكداب ومين الصادق .. ولا حد بيتحاكم بتهمة البلاغ الكاذب والسب والقذف ولا حد بيتحاكم بتهمة التمويل والعمالة .. وطبعا العبيط بس اللى هيقول يمكن الاتنين صح !!..بحس ساعات ان فى ناس مش فاهمة ان النقيضين لا يجتمعان وان ماينفعش ان متناقض ومتناقض يتقاسموا الحقيقة ..ولازم فيهم واحد ابن تيييت وواحد ابن ناس .. لكن الناس بتستسهل تسمع وتسكت وتلوك فى خرافات وخزعبلات وكله فى البلالة وأسهل جملة تسمعها " أصل محدش فاهم حاجة !!" طيب دا بالنسبة للناس والحكام بقا ايه بطيخة هما كمان ؟؟!!.فين الأجهزة السونارية اللى بتكشف الحزام الناسف فى الأفكار قبل ما يحاوط الوسط ؟؟!!..

الثورة اتكروتت .. لما قالوا مجلس الشعب ما يحكمشى .. مع انه منتخب .. ولقينا نواب الشعب بيتكلموا عن خروج أمن .. ومرشحين رئاسة بيقولولنا حظ سعيد الثورة القادمة !!..

الثورة اتكروتت .. لما بقى الشعب يشوف سحل العسكر للمتظاهرين على انهم يستاهلوا !!..وتعرية البنات على انها مومس !!..والمجلس العسكرى هوا الجيش !!.. واللى بينزلوا التحرير عايزين يخربوا البلد - اللى هيا سويسرا واحنا مش عارفين - !!..

الثورة اتكروتت .. لما فى ناس كتيير اقتنعت انها خلصت .. واننا هننزل نحتفل بيها يوم 25 يناير ونعملها عيد ميلاد ونطفى الشمع ونلبس طراطير - احنا لابسينها فعلا - واضحك يا تامر ..وشاور لبابا يا لوئ علشان الصورة تطلع حلوة !!..وهوب هوب تتقلب الثورة كرنفال وبومب وصواريخ وبومبونى واللى هيفتح بقه يبقى بيعكنن على الشعب فرحته بثورة اللى بيحتفلوا بيها يا اما ماشركوش فيها او خانوها !!..ونلقاكم فى ثورة قادمة أحلى !!..

الثورة هتتفشخ .. لو استمرينا نقول على ازمة الانابيب " أدى اللى خدناه من الثورة " وأزمة البنزين " كله من الثورة " .. وناقص نقول ان البرد وتلج اسكندرية بسبب الثورة !!..

مش هقول ان البنزين اتمنع علشان مانعملش بيه مولوتوف نولع بيه البلد يوم 25 يناير .. ولا ان الانابيب اتمنعت علشان نبطل طبيخ ونخس شوية .. بس هقول ان اللى يقدر يقفل الحنفية ويفتحها ومعاه إعلام فاسد ..وشعب منقسم .. هيقدر يعمل أى حاجة ومش سهل خالص على فكرة ..

أنا مؤمن ان " تجوع الحرة ولا تأكل بثدييها " .. لكن طول ما فى ناس تقولك تعالى .... بس وكلنى وشربنى .. يبقى هما هينجحوا ويقلبوا الترابيزة على الكل .. وبدل ما هنعيش فى نعيم الثورة .. هنشرب مقلب " كروتة الثورة " !!..

 

 

 






شاهد ايضا

0 Comments


اضافة تعليق